Gjykata e Shkodrës ka lënë në burg Rrok Pepajn, babain e Danjel Pepajt, i cili është autori i vrasjes së Vilson Çutaj dhe Klement Pepaj në Malësinë e Madhe.
Pepaj ka mohuar akuzat se ka kultivuar bimë narkotike në zonë. Ai tha se kultivonte bimë medicinale dhe boronicë dhe se nuk kishte dijeni për parcelën me drogë.
“Nuk kam patur dijeni për parcelën sepse në mal kam mbajtur bagëti dhe kam mbledhur boronica. Unë thjeshtë e njoh si zonë pjesën malore por nuk e kam ditur se ku ka parcela. Di faktin që djali im ka patur një ngatërresë dhe se e kanë rrahur. Djalin tim se kam parë prej disa ditësh dhe di vetëm që janë ngatërruar dhe se e kanë rrahur disa persona. Unë nuk kam asnjë faj dhe nuk kam lidhje me këto pune sepse une jam i semurë dhe kam edhe gruan të sëmurë”, tha ai në seancën gjyqësore.
Rrok Pepaj akuzohet për veprat penale ‘Bashkëpunëtor në kultivimin e kanabisit’, dhe ‘Dhënie e dëshmisë së rreme.’
Danjel Pepaj, mbi te cilin rendojne tre akuza “Vrasje ne rrethana cilesuese”, “Armembajtje pa leje ” dhe “Kultivim i bimeve narkotike”, vijon të jetë ende në kërkim dhe dyshohet se është arratisur drejt Malit të Zi.
Pepaj, qëlloi për vdekje me kallashnikov Vilson Çutajn dhe Klement Pepajn, pas një konflikti midis tyre për parcelat me kanabis.
Më pas, i ka vendosur flakën gjithë parcelës së tij dhe u largua menjëherë, teksa la trupat e pajetë të kushërinjve pak metra larg.
Familja e Rrok Pepajt është ngujuar në banesën e tyre nga frika e ndonjë hakmarrjeje të mundshme.
