Komisioneri Publik ka kërkuar sot shkarkimin nga detyra të Drejtueses së Prokurorisë të Krimeve të Rënda, Donika Prela.
Ky institucion ka ankimuar vendimin dhënë Prelës, duke kërkuar që çështja të rishikohet nga Komisioni i Posaçëm i Apelimit, ndërsa thekson se Prela nuk duhet të ishte konfirmuar në detyrë nga KPA.
Komisioneri Publik, pasi shqyrtoi vendimin e mësipërm të Komisionit të Pavarur të Kualifikimit, vlerëson se bazuar në provat dhe faktet e administruara, znj. Donika Prela, nuk plotëson kushtet për konfirmimin në detyrë, duke hedhur kështu dyshime për disa transaksione bankare të padeklaruara nga Prela.
“Referuar deklaratave periodike vjetore të subjektit të rivlerësimit, sipas nenit 32/5 të ligjit nr. 84/2016, deklaratës “vetting”, rezultateve të hetimit administrativ, akteve të administruara dhe përfundimeve të arritura nga Komisioni, Komisioneri Publik, në rastin konkret konstaton se subjekti i rivlerësimit edhe pas kalimit të barrës së provës nuk ka arritur të provojë të kundërtën e rezultateve të hetimit, që në kuptim të nenit D, paragrafi 3, 5 i aneksit të Kushtetutës, do ta bënte atë subjekt të besueshëm në vlerësimin e pasurisë, e për pasojë të sillte konfirmimin e saj në detyrë“, nënvizon Komisioneri Publik.
