Kryetari i Partisë Demokratike të Kosovës, Kadri Veseli, ka udhëtuar drejt Britanisë së Madhe, ku do të zhvillojë takime të rëndësishme me zyrtarë të lartë të Partisë Konservatore Britanike.
Gjatë qëndrimit në Londër, me ftesë të Partisë Konservatore të Britanisë së Madhe, lideri i PDK-së do të ketë takime bilaterale me krerët e Partisë Konservatore Britanike në rrafshin politik dhe organizativ.
“Veseli do të diskutojë për huazimin e përvojave më të mira dhe transferimin e ekspertizës dhe asistencës së konservatorëve për fuqizimin e Partisë Demokratike të Kosovës dhe për hartimin e një programi të ri e modern për të ardhmen, njofton Zyra për Komunikim e kësaj partie”-shkruan RTK.
Vizita e Veselit në Britani, vjen në kuadër të angazhimeve të PDK-së për anëtarësim në organizatat ndërkombëtare të familjeve të partive të qendrës së djathtë.
Partia Konservatore e Mbretërisë së Bashkuar vijon të qeverisë prej vitit 2010 dhe është një nga partitë politike më të vjetra e të njohura në botë.
