PD ka nisur zyrtarisht fushatën për zgjedhjet e 13 qershorit. Të shumtë janë ata që e shohin garën brenda Partisë Demokratike si të pabarabartë. Në një deklaratë për mediat, kandidati për kreun e PD-së, Fatbardh Kadilli, prezantoi programin e tij për risinë në krye të demokratëve.
Ai ka pohuar se nuk trembet nga kandidatët e tjerë për kreun e PD-së. Kadilli ka thënë qartazi se nuk ka rival, pasi nuk ofrojnë asnjë ide dhe program të ri, por gjëra të konsumuara dhe të dëgjuara.
“Unë flas për një PD të hapur dhe të bashkuar, nuk ka PD që përjashton. Berisha është institucion, jo anëtar i thjesht, është vetë ai që e vendos distancën mes institucionit Berisha dhe atij të PD-së. Kam pritur për kolegët që u futën në garë, dhe meqë nuk u pranua propozimi im që të shikonim bashkarisht në anëtarësinë e rretheve, por nuk u pranua, ndaj do të shkojmë secili në hesap të vetë.
Nuk kam asnjë rival, as Basha as të tjerët nuk kanë propozime të reja, ku që propozoj unë një PD të hapur është e vetmja risi. Unë do të votoj më 13 qershor, dhe unë do e vijoj këtë projekt që është fitues.
Unë do të jem atje si udhëheqësi i një projekti fitues. Nuk kam punuar asnjë ditë të vetme dhe nuk jam paguar asnjë qindarkë nga SOROS, kam punuar për shumë organizata ndërkombëtare, por asnjëherë nuk kam punuar për këtë organizatë.
Për mua SOROS më kujton internacionalen komuniste. Përveç meje dhe z. Basha, nuk luajmë për numrin dy, nuk mund të bashkëpunoj në jetën ekzekutive”, deklaroi ai.
Një ditë më parë, kandidati surprizë për kreun e PD-së, Agron Shehaj nisi zyrtarisht fushatën nga Tirana. Shehaj në një konferencë për shtyp u shpreh se kandidimi i tij është për t’i dhënë Partisë Demokratike një ndryshim. Ai tha se zgjedhjet në 13 qershor nuk do të bëhen vetëm për kryetarin e partisë, por edhe për të vendosur rezultatin nëse PD-ja do të fitojë apo jo në zgjedhjet e ardhshme.
“Kandidimi im s’është një përpjekje për të marrë një post, por fillimi i ndryshimit të PD-së. PD-ja duhet të ndryshojë sot, që të jetë e mundur të ndryshojë Shqipërinë nesër. Nuk do zgjidhet vetëm kryetari i ri, por do të vendosin nëse duan të fitojnë ose humbasin prapë në zgjedhjet e ardhshme parlamentare. Në 13 qershor, anëtarët e PD-së nuk do të zgjedhin thjesht kryetarin e ri, por do të vendosin nëse do të fitojnë apo të humbasin prapë në 2025. Unë kam ndershmërinë, përvojën dhe aftësinë për ta çuar PD-në në rrugën e fitores”, tha ndër të tjera ai.
