Deputeti Myslym Murrizi njoftoi se ka kërkuar zyrtarisht largimin e Rudina Hajdarit, si bashkëkryetare të Komisionit të Reformës Zgjedhore.
Pas mbledhjes, Murrizi tha se Hajdari ka filluar të ketë të njëjta mendime me Damian Gjiknurin, dhe se nuk mund të përfaqësojë opozitarët e tjerë.
“Çfarë të na takojë ne si opozitë, të na e emërojë mazhoranca. Ne nuk e njohim marrëveshjen e firmosur. Është më e volitshme që ky Komision të mos drejtohet nga dy persona që ndajnë të njëjtin mendim me njëri-tjetrin, por jo me ne. Shkresa është dërguar. Kam mbështetjen e anëtarëve të tjerë të opozitës parlamentare. Është firmosur nga tetë të tjerë”, tha Murrizi.
Deklarata u bë pas mbledhjes së Komisionit të Reformës Zgjedhore. Opozita është shprehur kundër marrëveshjes, dhe ka thënë se pakti duhet të arrihet në Kuvend, pasi të pranohet kushti për ndryshim sistemi dhe lista të hapura.
