Një tjetër rast shëndetësor trajtuar nga “Fundjavë Ndryshe” dhe falë kontributit të çmuar të donatorëve ka dalë me sukses. Përpjekjet për të gjetur një zgjidhje emergjente për shëndetin e Ejsi Ballës kanë qenë maksimale. Drejtuesi i “Fundjavë Ndryshe”, Arbër Hajdari, ka dhënë lajmin e bukur për vajzën 4-vjeçare e cila i ka shpëtuar kthetrave të vdekjes pas 30 ditësh në reanimacion.
Themeluesi i “Fundjavë Ndryshe”, Arbër Hajdari, nuk ndali asnjë ditë përpjekjet, ndonëse shpresat shuheshin me kalimin e ditëve. Falë përpjekjeve të tij dhe stafit të “Fundjavës” e transportimit të së voglës drejt Italisë, jeta e saj ka ndryshuar përgjithmonë.
Ejsi ka arritur të dalë nga rreziku për jetën dhe vazhdon trajtimet në Itali. Ajo kishte bërë një ndërhyrje për apandesitin, dhe si pasojë e një bakteri i ishin bllokuar të dyja veshkat. Parametrat e vajzës ndryshonin dhe asgjë nuk kishte siguri për transportin jashtë vendit. Vajza u nis me avion sanitar drejt Italisë, falë apelit të vazhdueshëm dhe kontributit të rëndësishëm të “Fundjavë Ndryshe”.
Ja se çfarë shkruan Arbër Hajdari
KA GJITHMONË SHPRESË! Falë Zotit, mjekëve, kontributit tuaj që e mundësuat, Ejsi hapi sytë. Gjëndja e saj ishte kritike, aq sa disa herë mjekët e humbën shpresën se vajza do të jetonte, por jo përpjekjen për ta shpëtuar. Ejsi, donte të jetonte, 30 ditë me rradhë ka luftuar me disa sëmundje të ndryshme të cilat po i mernin jetën. Në kohë rekord midis shumë vështirësive, u bë e mundur nisja me avion sanitar drejt Italisë. Ne stafi i Fundjavës, jemi shumë të lumtur që Ejsi ka dalë nga rreziku për jetën dhe vazhdon trajtimet në Itali. Ju përqafojmë të gjithëve, ne të gjithë bashkë kemi bërë një mrekulli. FALEMINDERIT ZOT!
