Historiani Neritan Ceka u kthye në një personazh mjaft i komentuar në rrjetet sociale e jo vetëm pak ditë më parë, pas mallkimit të bujshëm të tij ndaj të gjithë atyre që do shpërdorojnë votën në 30 qershor.
“Shqiptarë, në 30 Qershor ju vraftë Zoti nëse shkoni në votime, jeni të marrë dhe ju vraftë Zoti. E kam të drejtë se unë jua kam dhënë me disa shokë të e mi këtë votë, që duan ta shpërdorojnë në 30 Qershor. I zëntë bukën e kalamajve. Ai që shkel mbi votën, ju qërrofshin sytë”, shpreheshe Ceka.
Mbrëmjen e djeshme, teksa ka qenë i ftuar në emisionin “Opinion”, Ceka i është rikthyer zakonit të vjetër. Ai nuk është kursyer, dhe ka mallkuar kryeministrin Rama, si për ti kthyer përgjigje thumbimeve që ky i fundit i ka bërë në takimet elektorale. Ai tha se nuk i shkon përshtat që të bëhet karagjoz, që bredh në Shqipëri e tregon batuta.
“Karagjoz unë nuk bëhem. Karagjoz si një njëri që bredh në Shqipëri e tregon batuta. I këndojnë këngë si Enver Hoxhës në Tepelenë. Unë them për të: I këndofshin këngën e Haxhi Qamilit”, tha Ceka.
Po kështu, Ceka shtoi se “një pjesë i kam çmallkuar. Dekretoj, çdekretoj, se unë kam marrë një fuqi. Tani nuk jam penduar për ata të Bulqizës, për ata të Peshkopisë, trustin e lulelakrës, që ishte me ministrin e Brendshëm, me ministrin e Industrisë…ore ç’është ky popull që shikon si një shef policie dhe vjedh votat dhe kërkon Bulqizën, pse kërkon Bulqizën? Apo e di se aty është miniera. Çfarë t’i them unë kur shikoj fëmijët e njomë të Bulqizës që me ato duar të vrara, marrin copat e metalit dhe ato do t’ia vjedhin. Kush do të më mbushë mendjen ti çmallkoj? Nuk i çmallkoj, jo nuk i çmallkoj”.
