Nga: Marsel Lela
Pas një vale të gjatë përplasjesh me gazetarët, mbylljes apo ‘transferimit’ të disa programeve televizive për shkak të tonit të tyre kritik ndaj qeverisë, si dhe bojkotit nga e majta dhe e djathta, u krijua ideja se muri ndaj fjalës së lirë nuk kishte ku të shkonte më i lartë. Por një lajm i tri ditëve më parë i Policisë së Shtetit tregoi se seria e fundit e ‘blloqeve’ mbi këtë mur nuk ishte vënë akoma.
Policia e Shtetit njoftoi një dalje për mediat, lidhur me aplikimet dhe testimin e të rinjve për Patrullë të Përgjithshme. Deri këtu shkon normalja në këtë njoftim, pasi në fjalinë e dytë lexuesi përballet me diçka groteske. Policia e Shtetit njoftonte lidhjen në rrjetet sociale të drejtorit të Kolegjit Policor, Ylli Vasili, jo vetëm në FB-në e institucionit të policisë, por edhe përmes ERTV-së, televizionit online të kryeministrit Edi Rama.
Është e pashmangshme që kjo mos të të sjellë ndërmend kohën kur shqiptarët ‘laj, thaj’ një TVSh kishin, ku shikonin me orar atë që u diktonte partia. Ky televizion duket se është zëvendësuar sot nga media personale e Ramës, meqë prej saj transmetohen çdo ditë qëndrimet politike të qeverisë ndaj çështjeve më të rëndësishme, kritikat ndaj opozitës dhe ‘armiqve’ të brendshëm dhe të jashtëm, arritjet e saj, e së fundmi edhe ngjarjet e rëndësishme të institucioneve shtetërore që kanë të bëjnë drejpërdrejt me qytetarët.
“Ju flet Tirana, po japim lajmet!” Ata që janë mbi të tridhjetat e kujtojnë mjaft mirë këtë ‘parullë’ që hapte çdo edicion informativ në të vetmen media të Shqipërisë komuniste, Radio Televizionin Shqiptar.
Njëjtë si ERTV, edhe RTSH e asaj kohe transmetonte qendrimet politike, arritjet e socializmit, luftën e klasave dhe gjithëfar i leverdiste aparatit të propagandës shtetërore. Përveç ‘të guximshmëve’ që sajonin antena me kanaçe për të parë ‘jugosllavin’ apo stacionet italiane, të tjerët hanin ‘groshën’ e përditshme që ua servirte Tirana. “Tiranën, Tiranën, se të tjerat…”.
Leximi i raportit të OSBE/ODIHR-it për zgjedhjet vendore të 30 qershorit ishte i të njëjtës traditë. Edhe pse raporti fliste për zgjedhje me njëmijë probleme, trubadurët e qeverisë thonin të kundërtën. Ata i thurnin hosanara këtij raporti, ndërsa ERTV i transmetonte Live.
Edicionet kryesore të ditës ishin ato ku ‘folës’ qenë ministri në Detyrë për Europën dhe Punët e Jashtme, Gent Cakaj, që citonte nga raporti vetëm pikat ku fajësohej opozita, duke shmangur krejtësisht çështjet kyçe të 30 qershorit.
Edicioni tjetër niste me ministren e Shtetit për Marrëdhëniet me Parlamentin, Elisa Spiropali, e cila ‘recitonte’ një tekst ku akuzone kreun e PD-së Lulzim Basha dhe opozitën për shkatërrim të imazhit të vendit.
Kështu, duket se qeveria e ka krijuar median e saj. Një media pa gazetarë përballë, pa pyetje të sikletshme, vetëm me një kamera, një lap top dhe një skript përpara, që funksionarët e lartë të shtetit të ndihen rehat për të ‘bilbilosur’ atë që u dikton partia.
Nga ana tjetër, media e vërtetë, është sot në pikë të hallit për shumë arsye.
Ndërsa media tkurret përditë nën peshën e frikës dhe pasigurisë, media qeveritare me qendër në kompjuterin e kryeministit Edi Rama fiton sa më shumë terren, duke ftuar shqiptarët të shohin në ekranin e saj arritjet e qeverisë./politiko
