Çdo ditë e më shumë po thellohet konflikti në Partinë Demokratike për largimin e liderit demokrat, Lulzim Basha. Deputetët e PD-së i kanë dhënë ultimatum liderit demokrat që të hap dorëheqjen nga drejtimi i kësaj force, ndërsa i kujtojnë se është një lider i dështuar.
Ish-numri dy i Partisë Demokratike Jozefina Topalli, në emisionin “Dekalog” është pyetur se cili ishte mendimi për Grida Dumën. “Nuk e njoh Grida Dumën. Kush është kjo”, tha Topalli.
Topalli deklaroi se në këtë situatë që ndodhet PD-ja, vetëm Sali Berisha mund të arrijë të bëjë bashkimin e madh.
Deputetët e PD-së, Grida Duma dhe Ervin Salianji kanë kërkuar largimin e Bashës. Deputetja demokrate Grida Duma, deklaroi se beson që Lulzim Basha do të japë dorëheqjen. Ajo tha se Basha do të solidarizohet duke marrë parasysh edhe kohën që ka kërkuar.
“Sa më shumë të zvarritet kjo situatë, aq më shumë agravon. Besoj se do të ketë reflektim dhe zgjidhje. Besoj se ka një solidaritet me kohën që ka kërkuar. Ka njerëz që kanë bashkëpunuar dhe e shohin normale që të presin disa ditë. A ka kuptim të pritet? Të gjitha organet duhet të respektohet, duhet të tregohet kujdes nëse janë organet e votuara”, tha Duma.
Edhe deputeti i PD-së, Ervin Salianji shprehet se beson se vendimi i kryetarit të PD-së, Lulzim Bashës do të jetë dorëheqja e tij. Salianji tha se kriza e PD-së ka ardhur si pasojë e mungesës së besimit që kanë qytetarët shqiptarë tek ai. “Fokusin ta mbajmë tek mosardhja e kryeministrit sot. Shmangia që i bëhet kësaj kërkese tregon papërgjegjshmërinë e qeverisë. Për sa i përket kërkesës së grupit parlamentar të PD-së, nuk është një çështje ultimatumesh, besoj që kryetari i PD-së do të dorëhiqet për t’i hapur rrugën krizës që ka PD, që për fat të keq vjen kryesisht për shkak të mungesës së besimit që kanë qytetarët shqiptarë tek Basha. Nuk ka pasur tërheqje, besoj se do të ketë dorëheqje”, tha Salianji.
