Presidenti rus, Vladimir Putin i ka uruar shërim të shpejtë kryeministrit britanik, Boris Johnson, i cili iu nënshtrua mbrëmjen e djeshme kujdesit intensiv.
“Jam i sigurt se energjia juaj, optimizmi dhe sensi i humorit do t’iu ndihmojnë ta mundni sëmundjen. Dëshiroj t’u shpreh mbështetjen time të sinqertë në këtë moment të vështirë për ju”, thuhet në mesazhin e Putin për Johnson.
Boris Johnson u konfirmua me koronavirus 12 ditë më parë, kur edhe njoftoi se do të izolohej dhe do të punonte nga shtëpia.
Dy net më parë, Johnson u shtrua në spital me këshillimin e mjekut të tij personal, pasi simptomat e koronavirusit nuk i ishin larguar akoma.
Ndërsa mbrëmjen e djeshme mediat britanike raportuan për një përkeqësim të gjendjes së tij shëndetësore. Ai iu nënshtrua kujdesit intensiv pasi nuk mund të merrte dot frymë pa pajisje.
Ndërkohë pak më parë kryeministria njoftoi se gjendja e Johnson ishte përmirësuar dhe se ai mundet të marrë frymë edhe pa pajisje tashmë.
