Kryeminsitri britanik, Boris Johnson ka deklaruar se provat e hershme sugjerojnë se varianti i koronavirusit që u shfaq në vend mund të jetë 30% më vdekjeprurës.
Të dhënat janë vlerësuar nga shkencëtarët në Grupin Këshillimor për rreziqet, i cili ka informuar qeverinë.
Megjithatë, të gjitha provat mbeten në një fazë paraprake. Studimet kanë treguar tashmë se mund të përhapet më lehtë sesa versioni tjetër i virusit, shkruan BBC.
”Përveçse përhapet më shpejt, tani duket se ka disa prova se varianti që u identifikua për herë të parë në Londër dhe në jug-lindje, mund të shoqërohet me një shkallë më të lartë të vdekshmërisë.”, tha kryeministri Johnson.
Në 24 orët e fundit u regjistruan mbi 40 mijë raste të reja me covid dhe 1401 vdekje. Këto shifra e çojnë në 3.583.907 numrin e përgjithshëm të të prekurve që nga fillimi i pandemisë dhe në 95.981 numrin total të viktimave.
Varianti i ri i koronavoirusit u shfaq në një zonë të Londrës në shtator të vitit 2020 dhe besohet se është 70% më ngjitës. Deri më tani, ky variant është përhapur në 50 vende të botës.
