Paraditen e sotme, burri i mori jetën gruas në Krujë me një thikë, teksa ndodheshin në makinën e tyre. Artan Ismalaja, 51 vjeç, i mori jetën bashkëshortes së tij Klarita Ismalaja, 45 vjeçe.
Deri tani bëhet me dije se i gjithë krimi ka ndodhur brenda mjetit tip “Ford” në pronësi të tij. Më pas sqarohet se Artani ka tentuar të dëmtojë edhe veten me thikë, dhe është transportuar në spital, ku ndodhet nën kujdesin e mjekëve.
51-vjeçari me profesion kameraman, ka një dyqan në Tiranë përballë Fakultetit të Inxhinierisë së Ndërtimit. Prej vitesh çifti jetonte në Tiranë. Janë ende të paqarta se si ai ka hyrë brenda rrethimit të objektit ku është gjetur automjeti i tyre, pasi i gjithë objekti është i rrethuar me avlli betoni, shkruan “Shqiptarja”. Sipas policisë, çifti ka hyrë brenda territorit të objektit duke ndjekur një kamion, i cili është futur për të shkarkuar ushqim për lopët, pasi magazina është stallë lopësh.
“Më datë 05.07.2021, në orën 10:45, në Bubq, Krujë, në afërsi të një magazine, brenda mjetit tip “Ford” në pronësi të tij, dyshohet se shtetasi A. I., 51 vjeç, banues në Krujë, ka goditur me mjet prerës (thikë), bashkëshorten e tij, shtetasen K. I., 45 vjeçe, e cila ka ndërruar jetë. Më pas shtetasi A. I. ka tentuar të dëmtojë edhe veten me mjet prerës (thikë) dhe është transportuar në spital, ku ndodhet nën kujdesin e mjekëve. Grupi hetimor ndodhet në vendngjarje dhe po punon për zbardhjen e rrethanave të ngjarjes”, thuhet në njoftimin e policisë.
