Në momentin që presidenti amerikan, Donald Trump shpalli Jerusalemin si kryeqytet të Izraelit filluan kundërpërgjigjet, sa u duk se e gjithë bota ishte kundër SHBA-vë. Jehona e lajmit mbërriti dhe në vendin tonë dhe papritur ndjehemi të përfshirë në këtë konflikt pa na kërkuar njeri që të ndërhyjmë. Ambasadori i Shqipërisë në Organizatën e Bashkëpunimit Islamik ka shprehur qëndrimet e tij kundër vendimit të Trump për Izraelin.
Deputeti demokrat Tritan Shehu i kërkoi llogari Ministrit të Jashtëm Bushati duke e akuzuar se me qëndrimin e përcjellë përmes Ambasadorit në konferencën e OBI, të pa konsultuar as në Komisionin e Jashtëm dhe as me opozitën, e ka pozicionuar Shqipërinë kundër SHBA.
Pas viteve ‘90-të miqësia midis SHBA-ve dhe vendit tonë është e pa kontestueshme. Për këto 27 vite Shqipëria ka marrë mbështetjen e SHBA-ve gjatë gjithë kohës. I vetmi moment kur marrëdhëniet u dukën se u ftohen, ishte në momentin e armeve kimike. Shqipëria në këto momente duket se është midis dy zjarreve; SHBA-së që njeh Jerusalemin si kryeqytet të Izraelit, por dhe BE-se që ka bërë thirrje për dialog por parimisht është kundërt këtij vendimi. Pa përmendur liderët evropianë që janë kundër. Shqipëria çdo ditë e më tepër po kërkon hapjen e negociatave dhe anëtarësimin në BE. Por dhe t’i dalë kundër Amerikës në këtë momente nuk e ka mundësinë. Ndërkohë as të dalë kundër Evropës, kur po e kërkon aq shumë anëtarësimin brenda familjes Evropiane.
Akuza e deputetit Shehu vjen në një moment delikat. Atij i është përgjigjur me replikë ministri i Jashtëm, Ditmir Bushati i cili shpjegoi se në përputhje me Konventën e Vjenës, Presidenti, Kryeministri, Ministri i Jashtëm dhe ambasadori kanë plotfuqishmëri.
“Kjo është edhe arsyeja përse ai quhet i plotfuqishëm. Nuk do të vijë asnjëherë në Komision Ambasadori për të marrë mendim për këtë çështje”. Por Bushati tha se nuk ka një qëndrim të ri nga ana e Shqipërisë. “E kemi bërë këtë diskutim edhe për Palestinën në OKB me shumë prej jush. Është i njëjti qëndrim që Shqipëria ka mbajtur në OKB, në lidhje me 4 rezoluta të Këshillit të Sigurimit, rezoluta detyruese që i referohen 1967-s, në përputhje me linjëzimin tonë të politikës së jashtme 100% me atë të Bashkimit Evropian” sqaroi Bushati.
Tritan Shehu: Këto ditë me keqardhje kam parë që në një aktivitet të rëndësishëm dhe në një pozicion shumë të rëndësishëm të Shqipërisë që është ndërmarrë në Konferencën Islamike nuk është konsultuar komisioni i jashtëm dhe opozita shqiptare dhe për gjykimin tim janë bërë hapa të gabuar mjaft negative për vendin tonë dhe marrëdhëniet tona me SHBA. Ambasadori jonë atje në mbledhjen e Ministrave të Jashtëm mban një fjalim ku kthehet përsëri tek ’67, kërkon kufijtë e ’67, vendos kushte që nuk i ka vendosur as BE. Merr pjesë dhe miraton një rezolutë thellësisht anti-amerikane ku SHBA të mos jetë më intelekutor në zgjidhjen e çështjes së Lindjes së Mesme, një rezolutë e cila është shumë larg çdo rekomandimi dhe vetë politikës së BE, duke kaluar në ekstrem në qëndrimin antiamerikan. Pyes zotin/ministër si është e mundur një gjë e tillë, si ka mundësi një gjë e tillë? Pse nuk u ule në komisionin e jashtëm për një çështje kaq të rëndësishme, çfarë fshihet pas kësaj?
Ditmir Bushati: Së pari, anëtarësia jonë në konferencën islamike që tani është Organizatë e Bashkëpunimit Islamik daton në vitin 1992. Unë kam qenë gjimnazist dhe ju keni qenë në qeveri. Historia është shumë interesante. Nëse dëshironi mund të bëjmë edhe një seancë për këtë çështje. Shqipërinë në këtë konferencë e ka anëtarësuar zoti Berisha. Niveli ynë i përfaqësimit tradicionalisht ka qenë jo politik. Ftesat kanë qenë për Presidentin dhe Ministrin e Jashtëm, por niveli ynë i përfaqësimit dihet.
Nëse i referoheni vitit 1967, mund t’ju them se ka 4 rezoluta detyruese të Këshillit të Sigurimit. Mbi bazën e Kartës së OKB-së, Këshilli i Sigurimit ka rezoluta detyruese. Ky është qëndrimi i Bashkimit Evropian. Ky ka qenë tradicionalisht qëndrimi i Shqipërisë. Persona të ndryshëm më kanë pyetur përse nuk jemi shprehur. Por unë mund t’ju them që kjo qeveri nuk vuan nga gjigandomania që për çfarëdo lloj gjëje që shfaqet, qeveria të dalë me një qëndrim, duke pasur parasysh se qëndrimi i qeverisë shqiptare në këtë rast është ai qëndrim i pandryshuar ndër vite, i reflektuar tek vota jonë në OKB, në linjë me qëndrimin e Bashkimit Evropian. Ka 4 rezoluta zoti Shehu. Po shtoj edhe diçka tjetër meqenëse i referoheni Ambasadorit tonë dhe pjesëmarrjes së tij në konferencë. Kjo është detyra e Ambasadorit. Në përputhje me Konventën e Vjenës, Presidenti, Kryeministri, Ministri i Jashtëm dhe ambasadori kanë plotfuqishmëri. Kjo është edhe arsyeja përse ai quhet i plotfuqishëm. Nuk do të vijë asnjëherë në Komision Ambasadori për të marrë mendim për këtë çështje.
Dhe, së fundi, po e përsëris sërish se nuk ka një qëndrim të ri nga ana e Shqipërisë. E kemi bërë këtë diskutim edhe për Palestinën në OKB me shumë prej jush. Është i njëjti qëndrim që Shqipëria ka mbajtur në OKB, në lidhje me 4 rezoluta të Këshillit të Sigurimit, rezoluta detyruese që i referohen 1967-s, në përputhje me linjëzimin tonë të politikës së jashtme 100% me atë të Bashkimit Evropian. E përsëris edhe një herë, thjesht për informacionin tuaj dhe kërshëri shkencore: në Organizatën e Bashkëpunimit Islamik nuk votohet.
