Dje u mbajtën zgjedhjet për të zgjedhur kryetarin e Shoqatës së Futbollit Tirana. Fitues u zgjodh Krenar Alimehmeti, ndërsa kandidati tjetër Eduard Prodani u tërhoq pak pas nisjes së mbledhjes, pasi konstatoi se ishin votues anonimë në sallë. Në sallë kishte 65 anëtarë nga 41 që duhet të jenë, ku rreth 20 ishin persona që nuk i njihte njeri. Edhe Dritan Shakohoxha, tregoi se si u manipulua procesi për kreun e Shoqatës, dhe si po tentohet të manipulohet procesi për kreun e ri të FSHF-së.
Shpërthim me lëndë plasëse në derën e jashtme të shtëpisë së Armand Dukës
Mbrëmjen e djeshme, një sasi lëne plasëse ka shpërthyer në derën e jashtme të shtëpisë së kreut të Federatës Shqiptare të Futbollit, Armand Dukës në Durrës.
Ngjarja u regjistrua rreth orës 22:20, ndërsa bëhet me dije se lënda plasëse ishte në një sasi shumë të vogël, teksa nga shpërthimi janë konstatuar vetëm dëme të vogla materiale.
Nuk dihen ende rrethanat e kësaj ngjarje, ndërsa Duka nuk ka qenë në banesë gjatë shpërthimit, por ka mbërritur aty pak minuta më vonë.
Çfarë filmuan kamerat e sigurisë
Duka tha se kamerat e sigurisë kanë filmuar një person me kapuç, që shikohet kur vendos lëndën plasëse. Ai kishte marrë një mesazh kërcënues në telefonin e tij, ku thuhej se i rrezikohej jeta në rast se nuk do të jepë dorëheqjen për 24 orë.
Teksti i mesazhit gjendet në telefonin personal të Armand Dukës, ku ky i fundit kërcënohet me 60 plumba në kokë, nëse brenda 24 orëve nuk jep dorëheqjen.
“Ti luan me dy standarde, ti k*rv luan me lekët tona për 24 orë jep dorëheqjen ose 60 plumba i ke në kokë o k*rvë se betimi u bë i pakthyeshëm”, thuhet në mesazhin e dërguar në telefonin e Armand Dukës.
Armand Duka është akuzuar për manipulimin e zgjedhjeve në FSHF, e po ashtu edhe për shpërdorim fondesh. Po dje u regjistrua një tjetër skandal, ku u manipuluan zgjedhjet për kreun e Shoqatës së Futbollit Tirana. Përmes 24 votuesve anonimë, që u futën nga Duka, u arrit që të zgjidhej në krye të kësaj shoqate Krenar Alimehmeti, i vetëm në garë pasi kandidati tjetër Eduard Prodani u tërhoq pak pas nisjes së mbledhjes. Në sallë kishte 67 anëtarë nga 40 që duhet të jenë, ku 24 janë persona anonimë të shtuar nga Duka dhe jo delegatë legjitim. Ndërsa vetë Eduard Prodani dhe 18 mbështetësit e tij u larguan pak para fillimit të mbledhjes.
Shpërthimi/ Veliaj: Ai ka bërë shumë gjynahe, por kjo është vepër kriminale!
Sa i takon kësaj ngjarje, një reagim është pasuar nga kryebashkiaku Erion Veliaj. Ky i fundit ka deklaruar se pavarësisht përplasjeve që ka me Dukën, ai mbetet kundërshtari i tij dhe jo armiku. Veliaj ka apeluar ndaj se institucioneve ligjzbatuese që të bëjnë detyrën, dhe të vendosin përpara drejtësisë autorët.
“Duhet urgjent policia, prokuroria dhe kamerat, të sigurohet jeta e kujtdo. Ai është kundërshtari im, jo armiku im. Ai ka bërë shumë gjynahe, por kjo është vepër kriminale e dënueshme. I bëj thirrje policisë, prokurorisë, shërbimit informativ, të gjithë strukturave ligjzbatuese në Shijak, apo ku është rasti konkret i zotërisë, t’i sigurojnë jetën, t’i garantojë qetësinë familjare sepse nuk ka lidhje fare shtëpia dhe familja me çfarë bën secili prej nesh në aktivitetin publik. Thirrja ime është që jo vetëm të zbulohen sa më parë, në mënyrë të pamëshirshme me këdo që bën gjeste të tilla”, u shpreh Veliaj.
Basha: Zhvillimet rreth FSHF-së, tregojnë degradimin e pushtetit të korruptuar!
Edhe kryedemokrati Basha, ka reaguar pas shpërthimit në banesën e kreut të FSHF-së, Armand Duka. Basha shprehet se zhvillimet rreth FSHF-së tregojnë degradimin e një pushteti të korruptuar.
“Zhvillimet rreth FSHF-së, tregojnë edhe njëherë degradimin e një pushteti të korruptuar që qëllim të vetëm ka zaptimin me çdo mjet, të çdo institucioni. Strategjia e tensionit e shpalosur ditën e sotme, që kulmoi me eksplozivin e vendosur këtë mbrëmje në banesën e familjes Duka, duhet të ndërpritet me urgjencë dhe drejtësia të mos qëndrojë duarkryq”, shkruan Basha.
