Kryetari i PD-së në Lezhë, Zef Gjoka, ka dhënë dorëheqjen. Gjoka e ka paraqitur dorëheqjen pranë Partisë Demokratike, qendër, ndërsa nuk dihen ende arsyet e vendimit të tij. Gjoka u zgjodh në krye të PD-së në vitin 2018. Më parë ka qenë dhe deputet i kësaj forcë politike.
Mësohet se në mungesë të një kryetari, ky post po menaxhohet nga deputeti Agron Gjekmarkaj, i cili është edhe i deleguari i PD-së për Qarkun e Lezhës.
Një ditë më parë, drejtuesi i degës së Partisë Demokratike në Durrës, Ferdinand Xhaferaj, ka dhënë dorëheqjen nga ky post. Vendin e tij e merr Luan Hoti, me emërim.
Xhaferaj konfirmoi se dorëheqja është për shkak se pozicioni i tij si deputet, është i papajtueshëm me kreun e partisë në Durrës.
Xhaferaj ishte nga krerët e degëve të PD-së i rreshtuar përkrah kryetarit aktual, Lulzim Basha në debatin me ish-liderin e kësaj partie, Sali Berisha.
