Deputetja demokrate, Rudina Hajdari, është shprehur se regjistrimi i diasporës nga shteti shqiptar përbën një manipulim. Sipas saj, ky proçes duhet të bëhet nga KQZ, dhe jo nga ministra e Diasporës dhe ajo e Jashtme. Gjatë prezantimit të projekt-buxhetit për vitin 2020, për Ministrinë e Jashtme, deputetja e opozitës Rudina Hajdari hodhi kritika të forta.
“Nuk duhet të jetë në kompetencën e Ministrisë së Jashtme për tu bërë ky lloj regjistri. Ka ardhur një propozim që të bëhet nga KQZ, pra të jetë një organ i pavarur që të merret me regjistrimin e diasporës, dhe mos merret shteti shqiptar. A do ketë këtu një shkelje kompetencash, dhe kjo është një çështje serioze. Ne po parashikojmë që në zgjedhjet e 2021, të kemi diasporën të votojë në këto zgjedhje.
Nëse shteti shqiptar do bëjë regjistrimin e diasporës, atëherë do ishte një lloj manipulimi që ti bëhej këtij adresari dhe mund bëheshe një shkelje këtu. Prandaj është parashikuar që kjo kompetencë ti jepet KQZ, dhe mos merret shteti me regjistrimin e diasporës”, tha Hajdari.
Deputetja ka akuzuar Ministrinë e Jashtme, se nuk ka akordancë me institucionet e tjera, sidomos me Ministrinë e Diasporës, duke e cilësuar si jashtë realitetit.
“Edhe me ça shikoj unë, edhe me prezantimin e Majkos, ministrit të Diasporës, ju nuk keni fare akordancë me njëri-tjetrin. Jeni komplet jashtë realitetit, dmth nuk e kam parë kurrë Ministrinë e Jashtme të menaxhohet në këtë mënyrë. Jeni komplet jashtë realitetit, nuk dini çfarë po bëni. A jeni të konsultuar me ministritë e tjera, a e dini çfarë po bëni apo jo?”, ka përfunduar Rudina Hajdari.
