Kancelarja gjermane Angela Merkel deklaroi se Evropa ndodhet përballë një rreziku në betejën e saj kundër koronavirusit, pasi varianti indian Delta, kërcënon të zhbëjë përparimin e bërë në uljen e infeksioneve.
Në atë që mund të jetë deklarata e saj e fundit qeveritare në parlamentin gjerman, Merkel tha se përgjigjja e mëtejshme ndaj pandemisë, do të ishte një temë kryesore e diskutimit midis udhëheqësve të Bashkimit Evropian në një takim në Bruksel të enjten, shkruan Abc News.
Ajo vuri në dukje se numri i rasteve COVID-19 në bllokun prej 27 vendesh vazhdon të bjerë, ndërsa nivelet e vaksinimit rriten. “Pa asnjë dyshim, jemi të shqetësuar me variantin Delta”, u tha Merkel gazetarëve.
Zyrtarët shëndetësorë të BE parashikuan se varianti Delta do të përbëjë 90% të të gjitha rasteve në të gjithë bllokun deri në fund të gushtit.
Varianti Delta po pushton botën
Delta, varianti shumë ngjitës Covid-19 i identifikuar për herë të parë në Indi, është duke u bërë lloji dominues i sëmundjes në të gjithë botën.
Kjo për shkak të “transmetueshmërisë së saj të rritur ndjeshëm”, tha Dr. Soumya Sëaminathan, shkencëtari kryesor i OBSH-së, gjatë një konference shtypi në selinë e agjencisë në Gjenevë.
Studimet bëjnë të ditur se Delta është rreth 60% më e transmetueshme se alfa, varianti i parë i identifikuar në Mbretërinë e Bashkuar që ishte më ngjitës sesa lloji origjinal që doli nga Wuhan, Kinë, në fund të 2019.
