Duke marrë shkas edhe nga polemikat e fundit të festivalit të fundvitit, kompozitori Gjergj Leka ka zbuluar se në muajin janar ai do të ketë festivalin e tij. Mjaft i irrituar se çfarë po ndodh me artin në Shqipëri, Gjergj Leka zbuloi disa detaje në studion e “Provokacija”, lidhur me projektin e tij më të ri.
Formati i programit do të jetë i tillë, që të thërrasë për të kënduar ata që janë privuar për arsye të ndryshme nga muzika. Ai tha se ky festival do të fillojë të promovohet në janar deri në maj. Gjithçka po bëhet me buxhetin e tij, me misionin e vetëm për të ruajtur këngën shqiptare.
“Sa për sqarim, unë do bëj një festival timin. Po e them te ty. Unë mora shprehjen e famshme të Martin Luther King, “I have e dream” (Unë kam një ëndërr). Sepse nuk e ke idenë sa këngëtarë dhe autorë, jo vetëm të brezit tim që janë luftuar, nuk kanë dalë në festivale dhe unë gjeta një formulë. Ti thërras të gjithë dhe të njëjtën këngë ta këndojë i riu bashkë me të vjetrin.
Ky festival do fillojë të promovohet në janar deri në maj, në finalet që do bëhen dhe të gjithin po e bëj me lekët e mia dhe me sponsorin që do gjejë vetë, për të thënë se ne kemi mundësi të ruajmë këngën shqiptare. Unë nuk jam i vjetër në këndim, jam i vjetër me moshë dhe shyqyr se më ka vlejtur të mësoj shumë gjëra. Mua më ka pjekur jeta në një gjë, që kam kuptuar edhe gabimet që kam bërë falë situatave dhe falë njerëzve. Mendoj se Shqipëria sot duhet të ketë festival. Shqipëria sot gjendet në pikë të hallit. Ore nuk thashë kot ‘peshku qelbet nga koka’, nuk po bëhet asgjë. As për artin, as për muzikën, ça presim ne të bëhet për festivalin”, deklaroi Leka.
