Ministrja e Shëndetësisë, Ogerta Manastirliu, ka publikuar një video-mesazh të rektorit të Universitetit të Mjekësisë, prof. Arben Gjata referuar situatës me pandeminë. Me një mesazh të drejtërdrejtë, ai apelon ndaj qytetarëve që të vijojnë të zbatojnë masat e distancimit social dhe higjienës personale, edhe gjatë kësaj periudhe të hapjes.
Pas një periudhe të gjatë izolimi, Arben Gjata ka dhënë një lajm mjaft të mirë për shqiptarët. Ai tha se jemi në fundin e periudhës së epidemisë. Situata po shkon drejt përmirësimit dhe këtë e dëshmojnë shifrat e përditësuara nga Ministria e Shëndetësisë.
“Jemi në fundin e periudhës shumë të vështirë që kaluam të gjithë së bashku, të kësaj epidemie shumë të rëndësishme. Janë duke u marrë masa të hapjes së ekonomisë, jetës sociale, të mënyrës si punojmë, si jetojmë.
Jemi drejt një finishi, ku të gjithë kemi dhënë kontribut. Falënderimi i parë është për mjekët në vijën e parë, por pa ju, pa bashkëpunimin dhe mirëkuptimin tuaj, do të ishte e pamundur t’ia dilnim kësaj situate.
Do të kërkoja nga ju që të vazhdojmë të jemi të ndërgjegjshëm, që janë vetëm masat e distancimit fizik, ruajtja e distancës, e higjienës personale, që janë të domosdoshme t’i vazhdojmë edhe në këtë periudhë hapjeje, në mënyrë që të mos kemi kthim mbrapa.
Është mënyra e vetme dhe e domosdoshme, që ne të përshtatemi me realitetin e ri, me mënyrat e reja të jetesës, deri në fund të epidemisë, dhe kur të kemi masa të sigurta që të luftojmë siç duhet këtë virus.
Ju bëj thirrje të gjithëve të na e lehtësoni punën në të ardhmen, siç keni bërë deri tani, duke respektuar rregullat e distancimit dhe higjienës personale”, shprehet Gjata.
