Duke parë situatën e rëndë me koronavirusin në Shqipëri, Komiteti i Ekspertëve ka vlerësuar që të ndalohen grumbullimet me më shumë se 10 persona, në ambiente të hapura dhe të mbyllura. Po kështu të ndalohen mbledhjet partiake dhe tubimet, konferencat, ceremonitë martesore, organizimet mortore deri në një vendim të dytë.
Kjo çështje ka nxehur gjakrat, ndërsa deputeti Kujtim Gjuzi ka shpërthyer në Kuvend, ku i ka kërkuar llogari kryetarit të Kuvendit, Gramoz Ruçi. Gjuzi tha se në Kuvend ndodhen 120 persona, dhe kjo është jashtë rregullores së Komitetit. Por kryetari i Kuvendit tha se është marrë leje, duke plotësuar të gjitha kriteret si distanca fizike, mbajtja e maskës dhe ulja e kohës së qëndrimit në sallë.
Kujtim Gjuzi: Ti e di që unë nuk abuzoj kollaj kur e marr fjalën. Sot në Kuvend jemi gati 120 veta, dua shpjegim. Nëse iu shohin, veprojnë si ju. Kam kasetë të drejtorit të spitalit në Krujë, që u kërkon pacientëve.
Gramoz Ruçi: Ministria dhe Komiteti na kthyen përgjigje, na thanë që Kuvendi të vazhdojë punë dhe të ruajë të gjitha masat; distanca fizike, të mbajnë maskat dhe të ulet koha e qëndrimit në sallë në seancat plenare. Kjo është arsyeja se duke vlerësuar këtë rekomandim, e ulim kohën nga 4 orë në 3 orë. Jemi në të gjitha rregullat e Komitetit të Ekspertëve.
