Presidenti Ilir Meta në një deklaratë për mediat këtë mëngjes ka bërë thirrje të qartë për palët politike duke u shprehur se nuk duhet të shkojë vendi në konfrontim.
Ai tha se palët duhet t’i thërrasin mendjes dhe të mos tregohen egoistë, por të mendojnë për të mirën e vendit dhe të mos e çojnë atë në konfrontim.
“Shqipëria nuk ka pse të shkojë në konfrontim. Të gjithë të marrin përgjegjësitë e tyre. Askush nuk duhet t’i delegojë përgjegjësitë e tyre, aq më tepër presidentit të Republikës. Palët e dinë shumë mirë se ç’duhet të bëjnë. Janë të vetëdijshëm për pasojat që duhet të kenë”.
Ka qenë kjo deklarata e presidentit Ilir Meta, para Konferencës së 3-të të Industrisë së Bimëve Mjekësore dhe Aromatike me temë: “Kultivimi i bimëve mjekësore dhe rritja e cilësisë, garanci për rritjen e punësimit dhe eksporteve”.
I pyetur nëse ka thirrur një tryezë politike për të zgjidhur krizën në vend mes palëve politike, ai u përgjigj: Askush nuk mund t’i transferojë përgjegjësitë tek të tjerët aq më tepër tek presidenti. Ata e dinë mirë se çfarë duhet të bëjnë dhe duhet të jenë të përgjegjshëm për pasojat që do të kenë nëse do të shkojë vendi në konfrontim.
