Djali i një prej eksponentëve të lartë të Partisë Demokratike, Sokol Olldashi, është i mendimit se Topalli, Patozi dhe Murrizi kanë krijuar parti për shkak të inatit. Në prononcimin e tij për ‘Euronews Albania’, Glauk Olldashi foli për partitë e reja që janë krijuar nga disa ish-zyrtarë të lartë të PD.
Ai i ka konsideruar si parti të krijuara për shkak të inatit, dhe se nuk beson se do të kenë ndikim në rezultatin që do të marrë PD në zgjedhjet e 25 prillit.
“Ata kanë bërë zgjedhjet e veta, nuk mund të gjykoj sepse unë jam djali i tyre në moshë. Ata të gjithë kanë bërë gjykimin e vet. Sa i përket ndikimit në zgjedhje, varet nga kandidaturat e PD.
Nëse PD do ketë kandidatura shumë të mira, ndikimi i tyre do jetë zero. Janë parti inati, mllefi. Pra, votuesit e Jozefinës, Astritit janë votues që votojnë me mllef dhe nuk do të votonin PD nëse nuk do të ishin këto parti”, shprehet Glauk Olldashi.
Glauk Olldashi është angazhuar në PD që prej disa vitesh tashmë, duke u përkushtuar kryesisht në aktivitetet e Forumit Rinor.
