Ramazan Rraja, nipi i deputetit socialist, Rrahman Rraja konfirmon se nuk është arratisur, pasi akuzohet se së bashku me dy persona të tjerë, kanë terrorizuar tre të rinj në ambientet e një lokali. Ai e ka konsideruar si një ngjarje të stisur nga policia e Prokuroria, ndërsa pohon se ka prova se nuk është pjesë e ngjarjes në fjalë.
“Ngjarje e stisur nga policia e Prokuroria. Nuk jam arratisur, të më nxjerrin një provë e vij. S’jam arratisur nga Shqipëria, aktualisht jam në Dubai. Natën e ngjarjes kam qenë në shtepinë time, kam prova. Nuk kam konflikt me njeri, unë lëviz i qetë”, ka deklaruar ai për “News 24”.
Nga ana tjetër, policia bënte me dije se bazuar në provat e grumbulluara, janë identifikuar dhe shpallur në kërkim autorët e dyshuar të ngjarjes. Bëhet fjalë për shtetasit Ramazan Rraja, 28 vjeç, Alesio Dobrozi, 31 vjeç, banues në Fushë Krujë dhe Roan Brahimi, 29 vjeç, banues në Pllanë, Lezhë, me precedentë të mëparshëm kriminal në fushën e “krimeve ndaj personit”, “armëmbajtjes pa leje” dhe “narkotikëve”, të cilët menjëherë pas ngjarjes janë larguar jashtë vendit.
