Në “Edicioni Veror 2020”, ka qenë i ftuar Majk. Ai ndodhet në Dhërmi për të pushuar në bregdetin shqiptar. Artisti tha se për shkak të pandemisë, nuk kishte lëvizur nga Prishtina. Në këtë periudhë pandemie në të cilën po jetojmë, club-et janë të mbyllura dhe kjo i ka krijuar hapsirë për të pushuar. “Nuk e di sa do të qëndroj, nuk kam bërë plane. Tashmë club-et janë të mbyllura dhe vendosa të pushoj pak. Prej katër muajsh nuk kam lëvizur nga Prishtina”.
Lidhur me izolimin për një kohë të gjatë, Majk u shpreh se ka qenë një periudhë e vështirë. “Me thënë të drejtën jam mërzitur. 3-4 muaj lajme të këqija, depresion. Karantinën e kam kaluar me familjen”, u shpreh ai.
Gjithashtu ai foli edhe për planet e tij, sa i përket karrierës muzikore. Për shkak të pandemisë, Majk tha se nuk ka qenë situata që pritej, pasi kishte në plan nxjerrjen e një albumi. Majk tregoi gjithashtu se për shkak të pandemisë, ka anuluar shumë koncerte.
“Kemi humbur shumë. Me rëndësi është të jemi mirë, të kemi familjen sa më mirë dhe të kemi sa më pak viktima. Në fund të fundit, koncertet do të vijnë sërish”, tha Majk.
