Pas deklaratës “bombë” të deputetes Rudina Hajdari, se e kanë kërcënuar me jetë, një kundërpërgjigje e menjëhershme ka ardhur nga kreu i Kuvendit, Gramoz Ruçi. Ai ka thënë se i ka përcjellë shkresën Ministrit të Brendshëm, Sandër Lleshaj, i cili pritet të marrë masa për gjithë shqetësimet që ajo ka ngritur.
“Znj. Hajdari, e kam marrë shkresën tuaj, punonjësit do të bëjnë detyrën, dhe e kam përcjellë dhe mund t’i ketë vajtur Ministrit të Brendshëm, të merren masat për të gjitha shqetësimet që keni ngritur në shkresën tuaj”, tha më tej Ruçi.
Ndërkohë lidhur me konfliktet për kreun e grupit të demokratëve në Kuvend, Ruçi ka thënë se janë çështje që duhet t’i zgjidhin vetë deputetët. “Ua kam thënë edhe më parë: është e drejtë ekskluzive e deputetit të largohet nga një grup parlamentar, dhe e drejtë e grupeve të përjashtojnë anëtarët e grupeve.
Në këtë punë nuk jam unë, as kryetari i Kuvendit dhe as seanca. Është e drejta juaj, nuk ka punë as kryetari, as seanca. Problemet që kini brenda vetes, uluni, i zgjidhni, i konkludoni sipas rregullave demokratike të rregullores së Kuvendit”, deklaroi ai.
