Kryebashkiakja në detyrë e Shkodrës, Voltana Ademi ka reaguar pas ngjarjeve të rënda të shënuara ditëve të fundit në Shkodër. Ajo ka apeluar ndaj Ministrit të Brendshëm dhe Drejtorit të Përgjithshëm të Policisë së Shtetit, që të marrin në dorë situatën, pasi krimi po godet fortë.
Voltana Ademi i mëshon fort faktit se qytetarët kanë nevojë për rend dhe siguri, dhe se është detyra e strukturave të shtetit t’ua garantojë këtë.
Pak më herët, Policia e Shkodrës zbardhi ngjarjen e ndodhur në pedonalen e qytetit ku mbeti aksidentalisht e plagosur një kalimtare.
Për ngjarjen policia ka vënë në pranga 3 persona, ndërsa ka shpallur në kërkim një tjetër, i cili braktisi mjetin e tij në vendngjarje.
Po kështu, Shkodra është tronditur nga një shpërthim me tritol. Ngjarja ka ndodhur në orët e para të mëngjesit, në banesën e ish-basketbollistit të Vllaznisë, Nikolin Arra.
Statusi
Shumë e shqetësuar për ngjarjet e rënda që kanë tronditur rendin publik në qytetin e Shkodrës!
Në qendër të Shkodrës, në Pedonalen tonë, aty ku ne lëvizim në çdo moment të ditës, krimi godet! Një person i pafajshëm plagoset, thjesht duke qenë kalimtarë.
Pak orë më pas, në një lagje tjetër të Shkodrës, një shpërthim eksplozivi ka ngjallur ankth tek qytetarët!
I bëj thirrje Ministrit të Brendshëm, Drejtorit të Përgjithshëm të Policisë së Shtetit, drejtuesve vendorë të Policisë, të zbardhin një orë e më parë këto ngjarje kriminale dhe të vënë para përgjegjësisë autorët.
Mbështetja ime personale, por edhe e strukturave të Bashkisë Shkodër nuk ka munguar dhe nuk do të mungojë. Secili duhet të marrë përgjegjësitë ligjore që i takojnë!
Shkodra, shkodranët, kanë nevojë për rend dhe siguri në rrugët ku ata lëvizin dhe sidomos, në shtëpitë e tyre. Është detyra e strukturave të shtetit t’ua garantojë këtë.
