Shumica e miqësive zhvillohen aq natyrshëm, saqë as që e kuptoni se si apo kur nisën ato. Gjithsesi, në ndonjë rast ju duhet të bëni jo pak përpjekje për t’u miqësuar me dikë, për arsye nga më të ndryshme. Ja cilat janë truket më të mira psikologjike, që do t`ju ndihmojnë në këtë drejtim.
Kopjoni ata me të cilët doni të miqësoheni
Kur bisedoni me dikë, provoni të kopjoni gjuhën e trupit të tij, gjestet dhe shprehjet e fytyrës. Në vitin 1999, studiuesit e Universitetit të Nju Jorkut dokumentuan “efektin kameleon”, që ndodh kur njerëzit në mënyrë të pavetëdijshme imitojnë sjelljen e njëri-tjetrit, dhe kjo mimikë e lehtëson pëlqimin nga pala tjetër.
Kaloni më shumë kohë pranë tyre
Sipas efektit të ekspozimit, njerëzit kanë prirjen të pëlqejnë gjëra që janë të njohura për ta. Njohja e këtij fenomeni daton që nga vitet 1950, kur studiuesit zbuluan se studentët që jetonin më afër në konvikt, kishin më shumë gjasa të ishin miq sesa studentë që jetonin më larg.
Bëjuni komplimente njerëzve të tjerë
Njerëzit që keni përballë do të shoqërojnë cilësimet që ju përdorni për të përshkruar njerëzit e tjerë me personalitetin tuaj. Ky fenomen quhet transferim spontan i tipareve. Sipas ekspertes Greçen Rubin, “çfarëdo që thoni mbi njerëzit e tjerë, ndikon në mënyrën se si të shohin njerëzit”.
Jini vazhdimisht në humor të shkëlqyer
“Infeksioni emocional”, është dukuria që ndodh kur njerëzit ndikohen fuqimisht nga gjendjet shpirtërore të njerëzve të tjerë. Nëse doni t’i bëni të tjerët të ndihen të lumtur kur janë pranë jush, atëherë bëni më të mirën tuaj për të komunikuar emocione pozitive.
Miqësohuni me miqtë e tyre
Teoria e rrjetit social prapa këtij efekti quhet “afërsi triadike”, që do të thotë se dy njerëz ka të ngjarë të jenë më të afërt, kur kanë një mik të përbashkët.
Zbuloni herë pas here të metat tuaja
Sipas efektit ”pratfall”, njerëzit do t’ju pëlqejnë më shumë pasi të bëni një gabim. Por vetëm nëse ata besojnë se ju zakonisht jeni një person kompetent. Zbulimi se nuk jeni perfekt, i bën më të ndjeshëm njerëzit përreth jush.
Nxirrni në pah parimet që keni në jetë
Sipas një studimi, njerëzit tërhiqen më shumë nga ata që janë të ngjashëm me ta. Ky është i njohur si efekti i “ngjashmërisë-tërheqjes”. Ndaj nëse shpresoni të miqësoheni me dikë, përpiquni të gjeni një pikë ngjashmërie midis jush, dhe ta theksoni atë.
Buzëqeshni
Në një studim, gati 100 studentë panë fotot e një gruaje tjetër në njërën nga 4 pozat:duke buzëqeshur në një pozicion të hapur të trupit, duke buzëqeshur në një pozicion të mbyllur të trupit, duke mos buzëqeshur me një pozicion të hapur të trupit, ose duke mos buzëqeshur në një pozicioni të mbyllur të trupit. Rezultatet treguan që gruaja në foto pëlqehej më shumë kur buzëqeshte, pavarësisht nga pozicioni i trupit të saj.
Tregojuni atyre një sekret
Vetë-zbulimi mund të jetë një nga teknikat më të mira të ndërtimit të marrëdhënieve. Në një studim, studentët u ndanë në çifte, dhe iu tha se duhet të kalonin 45 minuta për t’u njohur më mirë me njëri-tjetrin. Eksperimentuesi iu dha një seri pyetjesh për të bërë, të cilat u bënë gjithnjë personale.
Për shembull, një nga pyetjet e ndërmjetme ishte “Si ndiheni mbi marrëdhënien që keni me nënën tuaj?”. Çifteve të tjera iu bënë pyetje më të përgjithshme të tipit “Cila është festa juaj e preferuar? Pse?”.Në fund të eksperimentit, studentët që do të bënin gjithnjë e më shumë pyetje personale raportuan se ndiheshin shumë më pranë njëri-tjetrit, sesa studentët që bënë biseda të përgjithshme.
Burimi i lajmit: https://www.iflscience.com/brain/17-psychological-tricks-to-make-people-like-you-immediately/all/
Përshtatur nga TIRANA TODAY
