Partia Demokratike zyrtarizon kandidatin e saj për të të drejtuar Bashkinë e Kavajës. Isa Sakja është personi që PD-ja ka vendosur ta kandidojë përballë kandidatëve; Dorian Muratit i kandiduar nga Partia Socialiste dhe Maksin Konës që vjen si kandidati i LSI-së.
Isa Sakja ka falënderuar Partinë Demokratike dhe kryetarin e saj, Lulzim Bashën duke thënë “Ndjehem pafundësisht mirënjohës ndaj këtij kandidimi dhe përunjësisht ju kërkoj mbështetjen tuaj. Unë e di qe kjo garë nuk është e lehtë, por të gjithë bashkë ne do të jemi fitues, pra le të startojmë! Angazhimi i gjithsecilit prej jush është i mirëpritur! Ju faleminderit!”
Zgjedhjet për kryetarin e bashkisë Kavajës do të zhvillohen më 25 qershor.
Kavaja kishte më parë një datë tjetër zgjedhjesh. Presidenti kishte dekretuar më parë datën 7 maj si datën e zgjedhjeve lokale në Kavajë. Opozita i kishte bojkotuar këto zgjedhje dhe nuk kishte paraqitur asnjë kandidat. LSI deklaronte se mbështeste kandidatin e PS-së.
Për datën 7 maj, Partika Socialiste kishte zgjedhur Klodian Shehin si kandidat të sajin. Kryeministri Rama e tërhoqi kandidaturën e PS-së më datë 6 maj, vetëm një ditë përpara se të zhvilloheshin zgjedhjet lokale. Opozita kishte paralajmëruar se do të protestonte paqësisht dhe s’do lejonte zgjedhje në Kavajë.
Data 25 qershor u vendos nga marrëveshja PD-PS e cila do të ishte data e zgjedhjeve parlamentare dhe për zgjedhjet e parakohshme lokale në Kavajë.
Pas marrëveshjes gjithçka ndryshoi, tri partitë e mëdha kanë tri kandidatët e tyre. Fitoftë më i miri.
