Kryeministri Edi Rama, në përpjekje për të larguar zërat për një bashkëqeverisje pas zgjedhjeve të 25 qershorit me kreun e Partisë Demokratike, Lulzim Basha, duket se po i përforcon gjithnjë e më shumë ato përmes deklaratave publike.
Në tentativën e tij të radhës për të justifikuar marrëveshjen e 18 majit, kreu i qeverisë, po hedh tezën e një bashkëqeverisje midis dy forcave kryesore politike duke eliminuar partitë e vogla. Këto të fundit Rama i cilëson si të panevojshme për sistemin demokratik.
“E godasin këtë marrëveshje si një pazar të madh mes PS-së dhe PD-së në kurriz të demokracisë, drejtësisë dhe në kurriz të partive të vogla, të cilat me gjithë respektin vetëm garante të demokracisë as kanë qenë ndonjëherë dhe as mund të jenë dot për vetë peshën e tyre”, theksoi sot kryeministri Rama.
Tezën e bashkëqeverisjes Rama e shtroi sot në komunikimin e tij javor duke theksuar se Shqipëria duhet të ketë një qasje të re në drejtimin dhe menaxhimin e vendit, ku mazhoranca dhe opozita dialogojnë e bashkëpunojnë midis tyre pa pasur nevojën e faktorit ndërkombëtar.
“Marrëveshja shkon përtej këtij fakti, si pjesë e një angazhimi të përbashkët si të mazhorancës dhe opozitës së dalë nga zgjedhjet e 25 qershorit, për të qenë së bashku në rrugën e hapjes së negociatave”, u shpreh ai.
Pikat e bashkëpunimit midis Ramës dhe Bashës pas 25 qershorit:
- Mazhoranca dhe opozita, të dala nga zgjedhjet e 25 qershorit do të angazhohen bashkërisht në rrugën e hapjes së negociatave.
- Këndvështrimet e ndryshme midis mazhorancës dhe opozitës nuk do të jenë më arsye për tu bërë gazi i botës në sytë e Evropës ku kaq rëndom jemi shfaqur sikur të ishim armiq me kombësi të ndryshme.
- Ashtu sikundër marrëveshja përcakton detyrimin e ndërsjellë të palëve si vullnet për të institucionalizuar dialogun mazhorancë-opozitë, pa pritur që partnerët e huaj të bëjnë shkesin thjesht për të na ulur në një tryezë. Nuk ka më nevojë që përpara se të flasim në shqip ta bëjmë këtë në anglisht.
- Tryeza e dialogut do të jenë e hapur dhe jo vetëm kur shkojmë zgrip.
- Në mënyrë periodike, kryetari i qeverisë dhe ai i opozitës do të takohen për të diskutuar për ecurinë e integrimit evropian, për çështje të interesit tonë kombëtar që duhen adresuar nga politika jonë e jashtme.
- Për mirëkoordinimin me faktorin shqiptar në rajon, në mbrojtje të interesave të shqiptarëve kudo ku ata jetojnë, po ashtu që të përfshijmë diasporën në jetën politike dhe ekonomike të vendit. Kjo është një pikë themelore e marrëveshjes.
- Zbatimi i saj na bën një shtet serioz në sytë e botës dhe një shtet evropian dhe i shqiptarëve, ku qeveria dhe opozita, vënë Shqipërinë mbi partinë, për të vendosur për interesin e gjeneratës tjetër pavarësisht faktit se kush fiton dhe kush humbet zgjedhjet, qytetarët të mos dalin të humbur.
(TIRANA TODAY)
https://www.facebook.com/edirama.al/videos/10154770293501523/
