Nëse është e vërtetë që e kuptojmë rëndësinë e gjërave kur i humbasim ato, në vitin e fundit kemi mësuar të vlerësojmë shumë gjeste dhe zakone, të cilat deri vjet i konsideronim si të mirëqena:midis tyre janë përqafimet, të zëvendësuara kryesisht me video-telefonatat dhe tani nga takimet bërryl me bërryl.
Nuk është ende koha për të hequr plotësisht dorë nga masat parandaluese, por pak nga pak do të rikthehemi të përqafojmë njëri-tjetrin, dhe përfitimet që do të nxjerrim prej tyre do të jenë jo vetëm morale, por edhe fizike.
Përfitimet nga kontakti fizik
Prekja fizike funksionon në dy mënyra. E para është prekja fizike e shpejtë, e cila na lejon të kuptojmë shpejt kontaktin (siç ndodh kur digjemi diku apo kur mbështetet një mizë në krahun tonë); dhe prekja e ngadaltë, e mundësuar falë një grupi nervash të quajtur aferentët C-prekës, të cilët stimulohen nga përkëdheljet dhe përqafimet.
Është pikërisht lloji i dytë i prekjes, ai që na bën të ndihemi mirë,duke bërë që trupi ynë të çlirojë oksitocinën (një hormon që luan një rol themelor në marrëdhëniet shoqërore, si dhe i ngadalëson të rrahurat e zemrës, dhe ul nivelet e ankthit dhe stresit) dhe endorfinën, që është hormoni i kënaqësisë dhe mirëqenies.
Por, siç e përmendëm më lart, përfitimet nga një përqafim shkojnë përtej një ndjenje momentale mirëqenieje ose kënaqësie. Për shembull, disa studime kanë treguar se fjetja gjumë i përqafuar nga partneri, ndihmon në rregullimin e gjumit:oksitocina që çlirohet përmes kontaktit fizik ndihmon në uljen e niveleve të kortizolit, një hormon që rritet kur stresohemi.
Një përqafim në ditë e mban larg mjekun
Ka edhe studime që tregojnë se përqafimet kanë një efekt shërues, dhe na ndihmojmë shumë për të luftuar infeksionet, duke rregulluar çlirimin e hormoneve që ndikojnë në sistemin tonë imunitar. Për shembull, sipas një studimi të vitit 2019, të flesh gjumë i mbështjellë nga krahët e partnerit, të mbron nga e ftohura e zakonshme.
Në përgjithësi, përqafimet na bëjnë të ndjehemi më të relaksuar. Dhe meqë është vërtetuar shkencërisht se ankthi dhe stresi kanë efekte negative mbi trupin tonë, atëherë është e qartë se përqafimi mund të jetë vetëm i mirë për ne. Ndaj që të gjithë mezi po presin që të rikthehemi në normalitet, për t’i dhënë sa më shumë përqafime njerëzve të dashur.
Burimi i lajmit: https://www.focus.it/scienza/salute/tutti-i-benefici-di-un-abbraccio
Përshtatur nga TIRANA TODAY
