Në Shqipëri sikundër në çdo vend tjetër, frika ekziston për falsifikimin e kartëmonedhave. Në jo pak raste, abuzuesit ia kanë dalë që t’ia hedhin kollaj pa u pikasur. Ata të cilët merren me këtë ‘lloj pune’, janë mjeshtër të qarkullimit të lekut. Por a e dini se kush është kartëmonedha më e falsifikuar në vend?!
2 000 lekëshi rezulton të jetë kartëmonedha që është falsifikuar më shpesh gjatë vitit 2019. Sipas raportit të Bankës së Shqipërisë, falsifikatorët kanë qenë më të prirur për të manipuluar pikërisht këtë kartëmonedhë, për arsye të ndryshme.
Pas 2 000 lekëshit, kartëmonedhat e tjera më të falfisikuara janë prerja 500 lekë dhe ajo 1 000 lekë, ndërsa ka më pak raportime për kartëmonedhën 5 000 lekë. Sa i përket monedhave, më e falsifikueshme është ajo e prerjes 50 lekë.
Sipas BSH, në 2019 janë zbuluar në treg 318 kartëmonedha 2000 lekë të falsifikuara, pasuar nga prerja 500 lekë me 125 copë false.
Janë gjetur 117 kartëmonedha të falsifikuara të prerjes 1 000 lekë si edhe 99 kartëmonedha të prerjes 5 000 lekë, shkruan ‘abcnews.al’. Ka patur të paktën 16 raste të konstatuara nga BSH të falsifikimit të kartëmonedhave 200 lekëshe.
Në total, BSH raporton për një rritje me 16 për qind të rasteve të falsifikimit të kartëmonedhave gjatë 2019.
Falsifikatorët i qarkullojnë ngado lekët, e në shumë karburante janë publikuar imazhet e abuzuesve falë kamerave të sigurisë.
