Arbër Çekaj, Fatmir Pjetri dhe një i paraburgosur i cili bëri sikur po priste damarët, do të izolohen për 90 ditë. Ky është ndëshkimi që vjen pas tentativës për tu arratisur, e cila iu dështoi. Arbër Çekaj dhe Fatmir Pjetri tentuan që të arratiseshin nga burgu 313 në Tiranë.
Pasi kanë varur çarçafët nga muri rrethues për te hyrja administratës, kanë nisur të zbresin, ku njëri prej tyre ka qënë pranë derës së daljes së burgut. Njëri prej personave që tentoi arratisjen është përplasur me gardianin ku edhe e ka goditur me një send të fortë, duke i shkaktuar dëmtime në kokë.
Kontrolli i Brendshëm i Burgjeve ka nisur verifikimet, për të parë nëse ka pasur shpërdorim detyre nga zyrtarë të tjerë të burgut 313, pasi tentativa e tyre nuk u konstatua nga asnjë gardian tjetër dhe pse burgu është i mbushur me kamera sigurie.
Si Pjetri, ashtu edhe Çekaj, të dy janë emra shumë të njohur për drejtësinë shqiptare. Dy të dënuarit tentuan të largohen gjatë orarit të ajrimit. Për të realizuar planin e tyre, ata kanë përdorur një litar të improvizuar dhe kanë tentuar të ikin nga pjesa e pasme për t’u shpëtuar kështu punonjësve të sigurisë. Rasti do të referohet në Prokurori nga Drejtoria e Burgjeve, ndërsa ata do të përballen me akuzën e tentativës së largimit nga vendi i vuajtjes së dënimit.
