Ish-truproja e Sali Berishës, Izet Haxhia, i akuzuar si pjesëmarrës në vrasjen e Azem Hajdarit, nga salla e gjyqit ka kërkuar ballafaqim me ish-kryeministrin, njeriun për të cilin thotë se di shumë gjëra.
Izet Haxhia ka qenë i drejtpërdrejtë në qëllimet e tij, pas ekstradimit në vendin tonë. Në seancën e kësaj të enjte, Haxhia ka deklaruar se ka ardhur në Shqipëri, pasi i dhanë garanci për jetën dhe se do të dëgjohej.
“Unë jam dëshmitar, kam ardhur të dëgjohem këtu. Nga viti ’90 deri në ’98 jam dëshmitar i shumë ngjarjeve të rëndësishme kriminale, që mund t’i djegin Sali Berishës”, ka qenë deklarata e Izet Haxhisë.
Izet Haxhia është një nga të dënuarit me 25 vite burg, për vrasjen e ish-deputetit demokrat, Azem Hajdari në shtator të vitit 1998.
