Është shtyrë sërish seanca për kërkesën e Izet Haxhisë, për rigjykim të dosjes “Azem Hajdari”. Ish-bodigardi i Berishës, ka kërkuar një trupë gjykuese që të ketë kaluar Vettingun dhe se nuk pranon që ta gjykojnë kolegët e Fatmira Hajdarit. Haxhia ka akuzuar gjyqtaren Fatmira Hajdari, bashkëshorten e deputetit të ndjerë, se është bërë palë me vrasësin e burrit të saj, Berishën, duke bërë që kolegët e saj të mos marrin përsipër këtë çështje.
“Dua të gjykohem nga gjykatës që kanë kaluar Vettingun”, tha ai. “Fatmira Hajdari shiti gjakun e burrit për t’u bërë gjyqtare. Nuk pranoj që të më gjykojnë kolegët e Fatmira Hajdarit”.
Për avokatin e Haxhisë, Bashkim Nikolli, i gjithë procesi është përballë ngjyrimeve dhe ndikimeve të forta politike. “Gjykata e Apelit është në duart e dyshes Rama-Meta. Fatmira Hajdari është bërë palë me Sali Berishën, vrasësin e burrit të saj, nuk dua që të gjykohem nga kolegët e saj”, është shprehur Haxhia në Gjykatë.
Izet Haxhia, i dënuar me 25 vite burg si bashkëpunëtor në vrasjen e Azem Hajdarit, kërkon rigjykim, pasi pretendon se i janë shkelur të drejtat në një gjykim i cili është zhvilluar në mungesë, dhe sipas tij, pa prova.
https://tiranatoday.com/izet-haxhia-kerkon-perjashtimin-e-trupes-gjykuese-gjykata-vater-e-njerezve-te-berishes-e-metes/
