Kryeministri Edi Rama, ishte sot në fshatin Floq të Korçës, i cili pak muaj më parë u përfshi nga tërmetet duke dëmtuar shumë prej banesave në atë zonë.
Rama e ka bërë të ditur këtë gjë në Facebook, ku edhe ka shpërndarë një video nga vizita e tij, në këtë fshat.
“ERTV Live: Floq, Korçë – Aty ku po rindërtohen shtëpitë e rrënuara nga tërmeti i qershorit, me objektivin që asnjë familje të mos mbetet në tendat e emergjencave, në fillim të dimrit”, shkruan kryeministri, krahas videos.
Ndërkohë, në bashkëbisedimin me banorët, Rama theksoi se objektivi i qeverisë që ai drejton, është që dimri të mos gjejë asnjë familje në tenda emergjencash, por të akomodohen në shtëpitë e tyre.
“Objektivi është që para dimrit të mos ketë njeri më në tenda. Dimri dhe i ftohti të mos i zërë nëpër tenda. Në fakt kemi krijuar dy fonde: një fond të bashkive të tjera të vendit dhe një fond nga fondi i fushatës së PS-së, por ka edhe përgjegjësi sociale nga ana e kompanive. Është krijuar një fond kompleks”, u shpreh ai.
