Redi Balla është 22-vjeçari i cili mbeti i plagosur në atentatin e mbrëmjes së djeshme në “Komunën e Parisit”. I riu i cili ka mbetur i plagosur, ka qenë brenda makinës së tij tip Audi me targa AB 943 DC. Nuk dihet nëse autori ka qenë në të njëjtën makinë.
Kanë qenë banorët e zonës, të cilët kanë raportuar për të shtëna armësh dhe më pas policia ka shkuar në vendin e ngjarjes.
Ngjarja ka ndodhur tek lulishtja në rrethrrotullimin e “Komunës së Parisit”. Kjo zonë është mjaft e frekuentuar dhe rrethohet nga biznese me kamera të shumta sigurie, ç’ka mund të ndihmojnë me zbardhjen e plotë të kësaj ngjarje, si edhe deri në identifikimin e autorit.
Njoftimi i policisë
Rreth orës 22:35, tek lulishtja në rrethrrotullimin e Komunës së Parisit, në rrethana ende të paqarta, dyshohet se është plagosur me armë zjarri brenda mjetit të tij të parkuar shtetasi R.B, 22 vjeç, i cili ndodhet në spital, nën kujdesin e mjekëve.
Shërbimet e Policisë kanë bërë rrethimin e zonës dhe po vijojnë kontrollin e saj për të bërë të mundur identifikimin dhe kapjen e autorit.
Grupi hetimor ndodhet në vendngjarje dhe vijon punën për sqarimin e rrethanave të ngjarjes dhe dokumentin e plotë të saj.
