Italia është bërë sot vendi i tretë në botë, që kalon pragun e 30 mijë viktimave të shkaktuara nga koronavirusi. Dy shtetet e tjera që e kanë kaluar këtë prag janë SHBA dhe Mbretëria e Bashkuar.
Në 24 orët e fundit, në vendin fqinj janë shënuar 243 viktima, duke shënuar një rënie të lehtë në krahasim me ditën e djeshme ku u regjistruan 274 vdekje.
Një rënie e lehtë duket edhe në numrin e rasteve të reja të konfirmuara. Gjatë 24 orëve të fundit janë shënuar 1,327 raste të reja, në krahasim me dje ku u regjistruan 1,401 raste.
Që nga shpërthimi i pandemisë, Italia ka regjistruar rreth 217 mijë raste infektimi dhe 30,201 viktima. Më shumë se 96 mijë njerëz janë shëruar nga koronavirusi, ndërsa mbi 89 mijë raste janë ende aktive.
Italia renditet e treta në botë si për numrin më të madh të rasteve me koronavirus, ashtu edhe për numrin më të madh të viktimave.
COVID-19 ka prekur më shumë se 3,9 milionë njerëz nga e gjithë bota, ndërsa i ka marrë jetën mbi 273 mijë personave.
