Një bandë shqiptaro-italiane me 6 veta, ku 4 prej tyre ishin shqiptarë ka rënë në prangat e policisë italiane. Ata akuzohen nga autoritetet e shtetit fqinj si grup i strukturuar kriminal që merrej me trafikimin e kokainës dhe heroinës nga Belgjika në drejtim të Italisë.
Sipas mediave italiane, operacioni i koduar “White Honey”- “Mjalti i Bardhë” ka zgjatur rreth një vit. Si fillim policia ka rënë në gjurmët e tyre pas një hetimi për shfrytëzim prostitucioni, ku ishte përfshirë një prej anëtarëve.
Grupi i përbërë nga shqiptarë dhe italianë kishte krijuar maskimin perfekt. Një nga drejtuesit e grupit kishte ligjërisht një fermë për rritjen e bletëve. Ferma përbëhej nga dhjetëra koshere, të cilat në fakt përdoreshin për të fshehur kokainën dhe heroinën.
Atyre u është kapur në flagrancë rreth 4 kg kokainë, ndërkohë që janë gjetur dhe një numër i madh kosheresh bosh, çka bën policinë të dyshojë se sasia drogës ka qenë shumë herë më e madhe dhe se tashmë ajo është hedhur në treg.
