Gjatë 24 orëve të fundit, në Itali janë regjistruar 161 viktima nga koronavirusi, një shifër e ngjashme kjo me bilancin e djeshëm ku u shënuan 162 persona të vdekur.
Kështu shkon në 32,330 numri total i njerëzve që kanë humbur jetën në vendin fqinj, si pasojë e COVID-19.
Sa i përket numrit të rasteve të reja, vërehet një rënie në krahasim me një ditë më parë. Sot u regjistruan 665 raste të reja, 150 më pak se dje.
Deri më tani, Italia regjistron gjithsej mbi 227 mijë raste infektimi, duke u renditur e gjashta në botë për numrin më të lartë të të infektuarve, pas SHBA-ve, Rusisë, Spanjës, Mbretërisë së Bashkuar dhe Brazilit.
Më shumë se 132 mijë persona janë shëruar në Itali, ndërsa mbi 60 mijë raste janë ende aktive.
Koronavirusi ka prekur më shumë se 5 milionë njerëz në të gjithë botën, ndërsa i ka marrë jetën mbi 327 mijë personave.
