Gjendet trupi i pajetë i një 63-vjeçareje nga Lezha, e cila ishte shpallur e humbur. Viktima, e identifikuar si Angjelina Gjoka është gjetur në zonën e Malit të Tyrbes, teksa kufoma e saj ishte e dekompozuar, dhe e parregullt nga ana strukturore.
”Sot në vendin e quajtur “Mali i Tyrbes”, Lezhë, është gjetur një kufomë e dekompozuar, e parregullt nga ana strukturore. Nga verifikimet e kryera nga ana e Policisë ka rezultuar se trupi i përket shtetases A. Gj., 63 vjeçe, banuese në Lezhë.
Kjo shtetase ishte shpallur e humbur, pasi më datë 25.02.2021, bashkëshorti i saj, shtetasi Ll. Gj. ka bërë kallëzim në Komisariatin e Policisë Lezhë, për largimin e saj nga banesa.”, informon policia.
Grupi hetimor, në bashkëpunim me Prokurorinë e Rrethit Gjyqësor Lezhë, po punon për zbardhjen e plotë të shkakut të vdekjes.
Sipas burimeve, më herët Angjelina Gjoka ka punuar si mësuese, ndërsa gjatë kohëve të fundit kishte shfaqur shenja depresioni.
