Mëngjesin e sotëm, një sherr për tokën mes disa kushërinjve në fshatin Garunjas të Lushnjes u mbyll me një bilanc tragjik, ku u vra 30-vjeçari Romeo Hasalla dhe u plagosën babai dhe dy vëllezërit e tij.
Kastriot dhe Afrim Hasalla ishin prej kohësh në konflikt me familjen e viktimave për një tokë të mbjellë me ullishte, e cila shkaktoi dhe viktima.
Romeo Hasalla u qëllua për vdekje me armë gjahu nga kushëriri i tij i parë, Kastriot Hasalla. Ky i fundit është shpallur në kërkim për ngjarjen bashkë me të vëllanë, Afrim Hasalla.
Viktima Romeo Hasalla, baba i dy fëmijëve të mitur, kishte dy ditë që ishte kthyer nga Greqia. Sot ai kishte shkuar bashkë me babain dhe vëllezërit për të punuar tokën, por humbi jetën.
Ngjarja ndodhi sot rreth orës 06:15, ku u vra Romeo Hasalla dhe u plagosën babai i tij, Shaip Hasalla dhe dy vëllezërit Emiljano dhe Laert. Në kërkim për ngjarjen policia ka shpallur dy vëllezërit Afrim dhe Kastriot Hasalla, si dhe djalin e këtij të fundit, Mario Hasallën, 20-vjeç.
