Qeveria serbe vendosi sot që të rihapë kufijtë e saj, që janë mbyllur që prej 15 marsit nga situata e krijuar nga koronavirusi.
Tashmë qytetarët të cilët kthehen nga vendet tjera, nuk do të kenë nevojë të posedojnë një test negativ të korovirusit, siç kërkohej më parë.
Përpara se të rihapeshin kufijtë, që të hyje në Serbi duhet të kishe një test negativ të COVID-19, jo më të vjetër se 72 orë, ose në të kundërt detyroheshe të kaloje 14 ditë në izolim.
“Pas përmirësimit të situatës me pandeminë, qeveria vendosi të rihapë pikat kufitare dhe të lejojë hyrjen e të gjithë njerëzve në Republikën e Serbisë, pa një test të detyrueshëm të koronavirusit dhe miratimin e komisionit”, thuhet në një deklaratë të qeverisë së Serbisë.
Serbia ka vendosur të rihapë gjithashtu edhe restorantet, kafenetë, shkollat dhe kopshtet, duke u kërkuar njerëzve të mbajnë distancë dhe të vendosin maska kur janë jashtë shtëpisë.
Serbia është vendi i dytë më i prekur nga koronavirusi në Ballkan, pas Rumanisë. Deri më tani në Serbi janë regjistruar rreth 11 mijë raste infektimi dhe 237 viktima.
Ndërsa Rumania regjistron më shumë se 17 mijë raste infektimi dhe 1,151 viktima.