Ish-zv.kryeministri Gazment Oketa, aktualisht anëtar i Këshillit Kombëtar të Partisë Demokratike u shpreh se banorët që janë prekur nga tërmeti i 26 nëntorit nuk kanë informacione se çfarë do të ndodhë me banesat e tyre, nëse do të shemben apo janë të banueshme. Sipas tij, ekspertët që kanë qenë dhe vijojnë punën në terren nuk kanë lënë gjurmë dhe shenja të qarta.
I ftuar në emisionit “5 Pyetjet nga Babaramo”, Oketa shtoi se duhet ecur më shpejt me kategorizimin e objekteve dhe operimin e rikonstruksionit të godinave.
“Nga sa unë kam prekur në terren grupet e inspektimit nuk kanë lënë gjurmë apo shenja të sakta për banorët, që ata të kuptojnë nëse janë për t’u prishur, restauruar apo kanë dëmtime serioze. Nuk dua të abuzoj se nuk kam informacion zyrtar, por ajo që kam konstatuar, psh; ekspertët francezë dhe ato izraelitë përdorin të njëjtët shenjat për ato godina që markojnë? Nëse do të shikoni godinat ka shenja me ngjyrë portokalli, diku blu, diku e gjelbër, diku ku është një tabelë që mban logon e bashkisë IKMT me shënimin që kjo është e banueshme. Por ka banesa të tjera ku qytetarët janë të paqartë dhe të pa informuar. Kam vizituar sot dy banesa dhe në gjykimin tim nuk kishte arsye se përse banorët të mos riktheheshin”, tha ai.
Po ashtu, Oketa tregon edhe si mund të ishte bërë më shpejt procesi i vlerësimit të banesave të prekura nga tërmeti.
“Do të kisha bërë një ftesë zyrtare përmes pushteti lokal të gjithë ekspertëve më të mirë të Durrësit, Tiranës, e të gjitha qyteteve për ekspertizë teknike dhe brenda një afati të shkurtër do të ishte bërë e mundur të përcaktoj se cilat objekte kanë dëmtime serioze dhe cilat më të lehta. Unë do të ndaja në dy kategori, e para bizneset e dëmtuara dhe në të tilla momente qeveria ka nevojë për aleatin e parë, median. Por nuk kuptoj si sulmon median kryeministri.
Kategorinë e biznesit do e ndaja duke krijuar raport besimi, që biznesi e di cilët janë inxhinierët më të mirë, dhe ju biznesmenë që jeni dëmtuar mund të operoni me ekspertizë private të riparoni dëmtimet dhe sillni faturat. Duke e lënë biznesin të vetëveprojë, të gjithë energjinë e shtetit do e përqendroja te qytetarët për t’u thënë se çfarë do të ndodhë me banesat e tyre. Por edhe objektet e rëndësisë së veçantë nga shkollat, te stadiumet, etj. Kjo do të ndikonte në një administrim më të shpejtë të krizës”, deklaroi Gazment Oketa.
