Ish-oficeri i Antidrogës në Fier, Antonio Nazeraj ka fituar ditën e sotme azil në shtetin e Holandës. Drejtësia holandeze ka siguruar mbrojtjen Nazerajt dhe familjes së tij. Nazeraj së bashku me Dritan Zaganin kanë qenë pjesë të njësisë Antidrogë të Policisë Fier.
Ai ka qenë oficer antidroge në Fier për tetë vite me radhë, ndërsa dha dorëheqjen nga policia më 2017.
Duke folur për mediat holandeze, Nazeraj shprehu frikën e kthimit në vend. Në gusht të vitit 2018, ai pohoi se kishte frikë nga ekstradimi:
“Unë nuk e shoh Shqipërinë si një vend të sigurt për veten time, kam frikë nga grupet kriminale që unë kam hetuar më parë, të cilët kanë marrë kontrollin e trafikut të drogës dhe po marrin mbështetje të fortë politike”, u shpreh Nazeraj.
Më tej ai theksoi se kur të kthehej (në rast ekstradimi) në Shqipëri do të jetë i vdekur, për shkak se ai kishte hetuar shumë grupe kriminale. Nazeraj në gushtin e vitit të kaluar shtoi se grupet e hetuara prej tij në Shqipëri kishin mbështetje edhe nga ana e politikës.
“Kur të kthehem në Shqipëri, jam 100 për qind i vdekur”, ka theksuar ai për median holandeze në gusht të 2018.
