Ish-ministri i Financave ka treguar se si e mori propozimin nga kryeministri Rama për emërimin në Këshillin Mbikëqyrës të Bankës së Shqipërisë, dhe arsyen pse e pranoi këtë ofertë.
I ftuar në “A2 Business Week”, Bode u shpreh se propozimi ishte me një mesazh dhe me anë të një individi, ndërsa theksoi se nuk ka pasur asnjë kontakt më herët me kryeministrin.
“Eksperienca ime e gjatë në çështjet e financave publike dhe kontributeve që kam dhënë, për shkak të angazhimit tim politik në fushën e ekonomisë dhe të financave të vendit, ishte intriguese pas momentin kur unë nuk isha më në politik. Praktikisht, pas zgjedhjeve të vitit 2017 nuk kam qenë i angazhuar. E vërteta është se nuk kam pasur asnjë kontakt me zotin Rama më përpara. Ka qenë një ftesë e tij, një propozim i tij me mesazh dhe përmes një individi. Kam diskutuar me njerëzit që kam bashkëpunuar gjatë dhe kam marrë këtë vendim, duke konsideruar një pozicion që nuk ka të bëjë fare me politikën, aq më pak me qeverinë, një pozicion në të cilin mund të jap kontributin tim dhe eksperiencën time të gjatë në fushën e financave publike dhe në fushën e ekonomisë së vendit. Po ashtu, me interes për të kontribuuar në vijimësi edhe me dijet e mia në një institucion shumë serioz dhe shumë kredibël të vendit”, tha Bode.
Më tej, Bode theksoi se ky vendim ishte një zgjedhje për të deklaruar publikisht shkëputjen e tij nga politika.
