Ish-ministri i Brendshëm, Dritan Demiraj, ka folur mbi gjendjen në të cilën ndodhet kampi Al Hawl në Siri.
Në një lidhje me Skype për Ora News, Demiraj deklaroi se në këtë kamp ndodhen rreth 23 fëmijë shqiptarë, teksa shton se e ka vizituar rreth katër muaj më parë këtë kamp.
Sipas tij, largimi i fëmijëve shqiptarë nga kampi sirian është i vështirë. Shkak për këtë vijoi ai, është roli që ka marrë Rusia nga tërheqja e SHBA-së brenda këtij kampi.
“Në Siri dhe Irak janë larguar 144 persona, një pjesë janë vrarë. Rreth 23 fëmijë sot gjenden në kampin Al Haël. Personalisht kam qenë para katër muajve në atë zonë, në Kurdistan, edhe pse nuk është bërë publike. Është një situatë e tmerrshme. Ky kamp quhet ndryshe edhe si kampi i vdekjes me 68 mijë persona nga të cilët 20 mijë veta janë fëmijë 5 vjeçarë. Sa i përket detyrimit të shtetit shqiptar dhe komunitetit fetar, të dy kanë rolin e tyre të rëndësishëm.Në rast se do të bashkëpunonin me njëri-tjetrin në një kohë rekord do bëhej i mundur riatdhesimi ose spostimi i tyre brenda Turqisë. Kryeministri Rama ka marrëdhënie shumë të mirë me presidentin Erdogan. Ushtria turke është afruar deri afër kampit. Një kordinim i mirë i Ministres së Mbrojtjes Xhaçka me homologun turk, në bashkëpunim me Ambasadën tonë në Stamboll dhe Ambasadën amerikane në Ankara të bëhej riatdhesimi i këtyre personave. Nuk ka ndodhur se nuk është aq e lehtë. Kampi ruhet nga forcat kurde. Kjo bëhet përmes një marrëveshje. Sot këtë vakumin mes pjesës siriane dhe kufirit turk sot po e monitoron dhe patrullon ushtria ruse”, tha ai.
