Ish-kryetari i Komisionit Qendror të Zgjedhjeve, Kristaq Kume u shpreh se nuk ka vendimmarrje të KQZ-së që shpall të pavlefshëm dekretin e presidentit Meta. Mirëpo theksoi se qëndrimi i KQZ-së për zgjedhjet vendore të 30 qershorit është në kundërshtim me dekretin e firmosur.
Ndër të tjera, Kume shpreson që ky proces të mos shkojë deri në fund, pasi sipas tij situata do të dilte jashtë kontrollit.
“Qëndrimi i KQZ-së është një qëndrim deklarativ. Dhe nuk ka asnjë vendimmarrje. Nuk ka vendimarrje të KQZ-së që është i pavlefshëm dekreti i presidentit. Por veprimi i këtij institucioni është totalisht në kundërshtim me atë çka kërkon dekreti. Në vlerësimin tim është një qëndrim që e ka rritur në mënyrë të skajshme valencën politike të këtij institucion.
Nuk besoj të shkojë deri në fund ky proçes. Si proçes zgjedhor jo se jo, por as si votim. Ose do doja që të mos shkonte. Sepse me këtë që shohim sot pres që situata të dalë jashtë kontrollit”, deklaroi Kume.
