Ish-futbollisti i kombëtares kuqezi Klodian Duro u arrestua në datë 27 mars. Ai u kallëzua nga ish-bashkëshortja e tij, e cila e akuzoi për dhunë në familje dhe përndjekje.
Ish-bashkëshortja ka marrë më herët urdhër-mbrojtje nga Gjykata ndërsa procesi i divorcit të çiftit Duro ndodhet në Apel.
42-vjeçari nuk i ka pranuar akuzat e ngritura nga ish-bashkëshortja, duke argumentuar se në shtëpinë e saj ka shkuar vetëm për të takuar të bijën, të cilën nuk e shihte prej kohësh.
Duro qëndroi vetëm pak ditë i arrestuar dhe hetimet vazhduan me të në gjendje të lirë.
Gjithsesi, sot është marrë vendimi me burg.
Gjykata Penale e Tiranës ka dënuar me gjashtë muaj burg ish-futbollistin e kombëtares, Klodian Duro për veprat penale “Dhuna në familje”, “Përndjekja” dhe “Veprime në kundërshtim me vendimet e gjykatës”.
Për shkak të gjykimit të shkurtuar, dënimi përfundimtar është katër muaj burg, shkruan “abcnews.al”.
