Ish-deputeti i Partisë Socialiste, Taulant Dedja përmes një statusi në “Facebook”, i ka bërë thirrje ish-kryeministrit Fatos Nano që të reagojë lidhur me gjendjen e vështirë politike ku ndodhet Partia Socialiste dhe vendi.
Dedja i drejtohet kreut të dikurshëm socialist që të mos heshtë por të thotë “një fjalë për atë që po ndodh sot”, teksa i kujton edhe 4 vitet e burgut që ka bërë.
Po ashtu, ish-deputeti i ka bërë thirrje për reagim edhe dy ish-presidentëve, Meidani dhe Moisiu, ndërsa ish-presidentin Topi e ka konsideruar si “mish për top”.
“Fatos Nano, nëse te dhimbset pak Shqipëria dhe partia për te cilën bere 4 vjet burg te padrejte, dil e thuaj një fjale për atë qe po ndodh sot! Nuk besoj se je duke shkruar ndonjë libër… Nuk e kuptoj as heshtjen tende, as te dy ish-presidenteve Meidani dhe Moisiu. Aq me pak te shkrimtarit kombëtar Ismail Kadare… Topi dihet qe shkoi ‘mish për top’”, shkruan Dedja.
Kujtojmë se Nano ka zgjedhur të mos përfshihet në politikë, ndërsa më herët nuk i është përgjigjur ftesës për të marrë pjesë në Kongres e Partisë Socialiste që u zhvillua më 23 mars.
