Publikimi i përgjimeve të djeshme nga gazeta gjermane Bild, ka shkaktuar polemika të mëdha në situatën politike shqiptare, në kohën kur vendi akoma ndodhet në protesta të vazhdueshme që kërkojnë dorëheqjen e kryeministrit.
Reagimi më i fundit ndaj këtij rasti vjen nga ish-deputeti i LSI-së, Përparim Spahiu i cili e cilëson këtë ngjarje si një nga shërbimet më të mëdha që i është bërë vendit në vitet e fundit.
“Nxjerrja e përgjimeve të prokurorisë është një nga shërbimet më të mëdha që i është bërë vendit vitet e fundit”, shprehet Spahiu.
Sipas tij, nxjerrja e këtyre përgjimeve tregon humbjen e besimit te prokuroria dhe gjykata, si dhe legjitimon çdo kauzë për të cilën opozita po “lufton”.
“Legjitimon djegien e mandateve dhe daljen nga ai parlament që nuk ka asnjë lidhje me votën e lirë dhe zgjedhje të ndershme. Legjitimon çdo protestë të bërë deri më sot por dhe vazhdimin e tyre, deri në rrëzimin e kësaj qeverie kriminale dhe të korruptuar”, vijon më tej ish-deputeti i LSI-së.
Publikimi i këtyre përgjimeve vjen në një kohë kur opozita e bashkuar kërkon me anë të protestave masive dorëheqjen e kryeministrit Rama, krijimin e një qeverie tranzitore dhe mbajtjen e zgjedhjeve të parakohshme.
Po ashtu, dalja e përgjimeve përkon me një “moment kyç” të vendit, teksa pritet të marrë vendimin nga KE për çeljen e negociatave.
Lidhur me përgjimet, aleatët e PD-së kërkuan sot nga presidenti Meta që të shtyjë datën e zgjedhjeve lokale me 6 muaj, pasi ata shprehen se s’mund të ketë zgjedhje me Ramën në krye të vendit.
Reagimi i plotë:
Nxjerrja e përgjimeve të prokurorisë është një nga shërbimet më të mëdha që i është bërë vendit vitet e fundit.
Tregon humbjen e besimit te prokuroria dhe gjykata aktuale, e gjitha e kapur nga Rilindja, nën darën e vettingut.
Legjitimon kauzën e drejtë të opozitës për blerjen masive të votës në zgjedhjet e vitit 2017, si dhe implikimin e strukturave kriminale në to.
Legjitimon djegien e mandateve dhe daljen nga ai parlament që nuk ka asnjë lidhje me votën e lirë dhe zgjedhje të ndershme.
Legjitimon çdo protestë bërë deri më sot por dhe vazhdimin e tyre, deri në rrëzimin e kësaj qeverie kriminale dhe të korruptuar.
